Thenna Kawl Eng Ka Tan A Thim

Ţhenna kawl eng ka tan a thim,

Lungduhlai then zawng a na ngei e.

Nain ka rum, tu’n min hnem zo lo,

Ka tuaran vanpui lo chim e.

Lairilan ka bawksawp a,

Chhungrilan ka tlusawp e.

Hringchan ni a kin hma zawng

Hringnun ar khaw thim daiin,

Min chhawmdawltu, nang, awm ta lo chu,

Phei chhamin ka leng dawn lo ni;

Lungrun, nang lo chuanin e,

Tluk leh tlak fawma bawksawpin,

Ţapin lungngaihna ruam ka hrut ang.

Ţam ngaina lo mihring hi

Hmangaihnaa rilţam dangcharin,

Tam chhawlin ka leng dawn lo ni!

AWM A AWM

Keimahah hian awm a awm,

Eng dang leng lova min luahtu chu.

Min nawr lui hauh si lovin

Theih loh min chhintir a,

Tih ngai loh min tihtir.

Ka nun dan min thlaksak a,

Ka nihna ka bo zo ve.

       Keimaha awm reng si hi e,

       Ka lo zawng leh ruai thin che a;

       Min kalsan ngai hauh si lo kha

       I hniak chhuiin rilru a vak chiam thin...

       I tuanna chin leh chang ka hre ta,

       Lungmawl thinlaiah ngei hian i awm...