Engmah lo mai ka ni

Min luah a, min nei zova,

Nghilh ni i awm thei lo.

I hmaah chuanin maw e

Ka chapona hi a bawkkhup a;

Ka intihveina hi a tlusawp a;

Ka huaisenna hi a tlawm a;

Ka tisa awmkhauh hi a khur asin!

Thudi hril tur ka ngah vei nen,

Ka lei hian sawi tur a van ruai a,

Ka ka a chih tlat a, a ang thei lo.

I lakah chuan ka nep em a,

Ka mizia ka bo zo a,

Ka nundan ka hloh zo a;

Lairilan ka zam lua em a,

Tunge ka nih ka hre ngam lo.

Min phuar rawh

Eng nge ka lungkham ang a,

Eng nge ka thlakhlelh ang le?

Engin nge min chimbuai ang a

Engin nge min tilunghnur ang le?

Ka lung hertu hian min hersan loh ahnu

Eng vangin nge ka buai tehreng ang le?

Hrehawm rau rauah amah vang a nih ahnu

Eng vangin nge ka tawrh zawh loh ang le?

Hetiang ka hriatin lunglen ka nuam a

Titi phunglenga thawi dam ka phal lo

Sual phuar phelha zalen hnu ngei hian

A zun leng zama zem ka hnial love

Thui tak thlengin lung chu leng se

Nghet takin a zunin min phuar teh se

AWM A AWM

Keimahah hian awm a awm,

Eng dang leng lova min luahtu chu.

Min nawr lui hauh si lovin

Theih loh min chhintir a,

Tih ngai loh min tihtir.

Ka nun dan min thlaksak a,

Ka nihna ka bo zo ve.

       Keimaha awm reng si hi e,

       Ka lo zawng leh ruai thin che a;

       Min kalsan ngai hauh si lo kha

       I hniak chhuiin rilru a vak chiam thin...

       I tuanna chin leh chang ka hre ta,

       Lungmawl thinlaiah ngei hian i awm...